L’Unione Italiana, in colaborasiòn con l’Università Popolare de Trieste, e col Patrocinio del Comun de Muja, la Cità de Buje e dela Region Istriana, publica el
Concorso „Dimela cantando“, 7° edision
per cansoni nove che le sarà sonade e cantade a la 8° edision de ’l
Cosa se ga de far?
Ghe vol mandar entro el 8 febrajo 2019 ore 12:00 la canson per posta ‘letrònica a’l indiriso: cultura@unione-italiana.hr con el tìtolo Dìmela Cantando 2019.
Cuando che mandè la canson, gavé de scrìver:
– tìtolo de la canson e chi che la ga scrita
– chi che ga fato la mùzica
– chi che la cantarà
– el testo in formato word
– la registrasion no propio definitiva, ma cuazi: la ga de èser registrada in studio in modo che la comision che la gavarà de sièlzer e chi che dopo el meti a posto le robe, el posi capir come che la zguarda. Cuesto no vol dir far la canson in “demo”, che semo ciari! Vol dir finida, ma anca che se pol canbiar cualcosa.
Stè ’tenti:
Le cansoni che mandè
– le ga de èser scrite in istroveneto
– no le pol èser stade mai publicade, cantade o sonade prima
– no le pol durar più de 3 minuti e mezo (secondo più, secondo meno)
Un autor el pol mandar a’l màsimo do cansoni.
E cosa femo dopo?
Tute le cansoni che le rivarà per tenpo, le sarà valutade in modo anònimo de una comision fata aposta che ghe ne sielzarà 14 in baze a’l valor artìstico e co’ particolare atension a’l testo. Sielte le canson, tuti i autori i sarà informadi de come che ze andade le robe entro el 20 de febrajo 2019.
L’organizator el se ciol el dirito de domandarghe a chi che ga scrito el testo de canbiar la parte che no la ze in bon istroveneto e, de conseguensa, de corèzar ’sta roba anca in te la parte cantada. Stesa roba la val anca per la mùzica e l’arangiamento. In parole pòvere: voi fe’ el vostro mejo, ma se’ d’acordo che cualcosa se pol anca canbiar, se servi, per far più bela la canson.
Cosa ze de novo ancora?
’Sta volta niente bazi (muzicali, se capisi) per cantar: le canson le sarà sonade da’l vivo de un’orchestra. Cuesto vol dir che, dopo la selesion, ve contatarà el produtor/capobanda de l’orchestra per capir insieme come sonar ’sta canson a’l mejo.
Come la va ‘vanti la storia?
Ben. Cuando che se se ga meso tuti d’acordo sun tuto (testo, mùzica, arangiamento) e se servirà canbiar cosa, gavaré un poco de tenpo per méter a posto le robe e mandar la canson come che la ga de zguardar per bon.
A i autori de le cansòn che le sarà sielte, ghe refondaremo le speze de incizion de la canson.
Cuando se vedemo dopo?
Cuando che l’orchestra la sarà pronta, se se incontra tuti insieme per far una prova generale.
E dopo, come senpre, faremo tre serate. Tute le date, come l’órdine de ezibision, ve le faremo saver per tenpo.
Cosa se vinsi?
Le canson le sarà sonade e cantade da’l vivo. Le meje, le vinsarà el premio.
Che premio?
Premio de la Giurìa (per la meja canson): 1.000,00 euro;
Premio per el mejo testo: 500,00 euro;
Premio per el mejo arangiamento: 500,00 euro
La giurìa la podarà dar anca una Mension per cualcosa de particolare che merita (ezecusion, interpretasion…) de 300 euro.
Premio de’l pùblico: 1.000,00 euro
Premio de i artisti: sorpreza!
Se scrivi in euro, ma pol èser anca controvalor in kune.
El premio el ghe va a’l autor de’l testo de la canson, dopo sarà lu che el spartisi a chi che ’l vol.
E per finir
I autori i ghe cedi i diriti de autor a’l organizator per ’sta ocazion, ma isteso ghe resta i diriti previsti da la lege.
E sì: chi che partèsipa a ’sto concorso el ze d’acordo co’ tuto cuel che scrivi cuà de sora, anca de èser filmado e de andar su Tele Capodistria!
Ve recordemo che l’istroveneto no ’l ze solo ’rimòniche e bei veci tenpi, ansi, pol èser tuto cuel che se vol e, soratuto, sarà apresade cuele cansoni co’ temàtiche e forme muzicali contenporanee…de ancùo insoma.